Sawrac WT: Cali Ileeye.

Cali Ileeye

Magaca : Sawrac
Curiye: Cali Ileeye
Godka: Jiifto
Uj: Qawmi (loolanka haybta)

Waayahan silsiladdiyo
Sooyaalka aan gudhin
Taariikhdan saabkaa
Waxa lagu sargooyaa
Saakiyo wixii jira,
Isa-sudhidda labadana
Waxa laga simaadaa
Saadaasha guushiyo
Siiyaalka kaa maqan;
Waxan uga socdaa taa
Inkastoon sirgaxanahay
Suluf iyo colaadiyo
Saranseer abaariyo
Saban adagna soomaray,
Ama suubbantaydii
Sanbabkeedu qalanyahay
Dhanna soobir qaawani
Sibraheeda yaalyaal
Cadawguna i saanyaday
Waxan ahay so’maaloo
Surka layma jari karo
Sinjigayga lama tiro
Saatirkeenna mooyee
Cidkaloo i tidhi siig
Sikastuu u daran yahay
Sujuud uuma dhigi karo
Sankuneefle kama baqo.

 

Sawracaygu waa KUUSH
Summadaydu waa dhaqan
Sunadii rasuulkiyo
Sahaydaydu waa diin.
Sal waxaan ku taagnahay
Xididkiisu sugan yahay
Baarkuna sarreeyoo
Siyar layma ridi karo
Suryo layma dhigi karo
Suuldaaro kuma dhaco
Soomaali baan ahay.

Magacaygan SOOMAAL
Waa sooryo gobonimo
Sulub caanaheedaan
Martidiyo socdaashada
Sibraar uugu shuba oo
U soo maala odhan jiray.

 

Marna waa so’maalo
Iidaanka subaggiyo
Hilibkoo la solay baan
Ku saruurad goyn jiray!

Timahayga saqafkiyo
Midabkaygan sugulkiyo
Samaydayda dhererkiyo
Sanqaroorka igu yaal
Iyo sarahan maaskiyo
Go’an labada qaar simay
Waa saasahaygiyo
Hidde baadi soocoon
Abidkood salguurayn.

 

Adiguna Sareedooy
Markad timaha soohdeed
Saddex qayda xidhatee
Dhaclahaaga sudhateed
Sinta iyo garaaraha
Laafyaha sabaysaa
Kalgacayl I saaqaa
Maariin sagaaraley
Ma anaa sunuujtiyo
Bacaw saancadaalaa
Waligaaba  kula simay.

 

Bisha soonfureediyo
Sannad baanu leenahay
Summal qoor-madowiyo
Saca geeska waynliyo
Suubbaanu dhaqanaa.

 

Saldhiggii adduunkiyo
Sabadii ayaankee
Geed-saaqu yaaliyo
Sool iyo Hargeysiyo
Soonaha Galbeediyo
Carta iyo Sabiixiyo
Wabiyada sunsumayiyo
Illamaa sablaaliyo
Dhoobley sinteeduu
Udubkaygu siman yahay.

Darka dhoofku saaqoow
Sarta Waashintooniyo
Sidni daaraheediyo
Ashqaraarka Sawbool
Adigoon u-aba-sixin
Nin le baa samaystee
Adba taadan saameel.
Yurub waa salleellee
Saxaraha ragbaa jira
Suugaan ku beeroo
Seeriyo ka dhigay hodan,
Nin garaad salaaxiyo
Seeteeye kala tage .
Saldhigeedu wuxu yahay
Hashan saaca aragtaay
Salbabaqa hungurigiyo
Salagsalagta mooyee
Gabibaa sokeeyee
Haadaantan suuree
Ama dee ku sii soco
Wadkibaa sanqanayee!

 

Hadduu gaal sawaabani
Kugu yidhi sillooniyo
Waxa tiin sadhiyo cudur
Ama duul sabooloon
Sirta nolosha garanayn!
Suu sheegay waa been
Adaa ugu sarreeyoo
Cidi kaaama sidatee
Sanka taag walaaloow
Soomaali baad tee.

 

Samo male gumaystuu
Ninka siiyay Xabashida
Soonaha galbeedee
En ef dhiina suuqdhigay
Awoowgayna waa siray
Gacan kama sugaayee
Ninka daba saqleeyoow
Adna saadanbaad garan
Marku soodhka kula dhaco,
Summaddeedu waxay tahay
Surucyada Khaliijkiyo
Sacsacaadda Barigiyo
Suntan reer galbeedkaba
Kobbanoo ku saxanee,
Ilbaxnimo salweeyee
Saakana ma eegnaa
Dhanka seera waaqiyo
Xeerkii Samaaliyo
Sunnadii rasuulkiyo (nnkh)
Summaddeeni waa’ waa’?

 

Hormadaasi socotaye
Xayn kalena soo daa.

 

Sooyaalku wuxu yidhi:
‘’Seeftii jihaadkee
Axmed Gurey la sarakacay
Sayid Maxamed noolee
Aweys dogobyo sii saar
Marki saartay heeryada
Faarax nuurna saalbaha
Suugaanta kula dirir
Qorshihii Salaan garay
Bashiir saancadaalaha
Sexashiyo hurdo u diid.

 

Tixihii suldaanee
Maankayga saanyaday
Hadba waxan ku sabayaa
Kasha saacu madhan yahay.

Barkhad gooha seeraar
Maahmaaho sogobaa
Abwaan qaasin saameel,
Hadba seexan waagii
Iidan  sanqadho kici,
Afqalooc na saasaha
Marka ay silloon tahy
Seedduu ka garan jiray,
Qarshee sawdka heestiyo
Garashada ku sooh luuq,
Guhaadbaa sirtii helay,
Xayow baa sarbeeb dhigay,
Keenadiid sursuur sheeg,
Hir Cawaale sii weri,
Gobonimo salkeediyo
Gadhle soohdimaha gabay
Maansada siyaakhadi,
Yamyambaa sakootiga
Suryadii naloo dhigay
Furay seetadeedii,
Ina Muumin siidhiga
Ka afuuf sud iyo buur,
Hadra waa sarreynlee
Gumarada la saabfurey
Saxarliyo dirkeedii
Siinleey ku faale,
Ina Dhamac sab-aalaha
Gunimada sidkeed go’ay
Saxansaxo ku sheegsheeg.
Dadnimada salkeediyo
Cabdi Muxumed sees taag
Dhaqankayga soocaa
Xasan Ganey sabaalee
Saymaha gumaystaha
Abshir bacadle saafsaaf
Saakana ragbaa nool
Sahan baana ii maqan.

 

Yartan xadhiga soohdee
Xalay saamalaykii
Saqda dhexe ku gaadhee
Suxulada dhamaysee
Saakana furfurasaay
Waa maxay sirgaxantani!
Sunbo iyo wax-garadkeed,
Ka qabyaalad siidhee
Saraceeda beeree
Qaranimo sugaayoow
Saasaad ka dhigan tahay.

 

Adna diinka seexdoow
Adigaa naq sugayee
Inta dunidu saa tahay
Iska suursanoow wali,
Ana suudalkaygiyo
Saranseerka dabadheer
Sanbabada ha iileen
Se’ waxaan ka digaya
Guryo-samo kolkaan dago
Sanqadhaada iga dhawr.

Suqdho iyo maraadooy
Adna dhaanka daba soco.

 

Hormadaasi socotaye
Xayn kalena soo daa

 

Singub baa tilmaamoo
Sacna waysha uu dhalay
Sanka kalama rooroo
Sidig kama jeclaade
Waxan nahay sokeeyiyo
Seedi iyo gacaliyo
Samiyaal is jeceloo
Dhami waynu simannoo
Soomaali baan nee
Ummadyahay sinnaan doon
Sirsir iyo faquuq diid,
Bulshayahay sabooldiid
Hodan iyo sarayn doon,
Dhalinyahay  saxnaan doon
Sallid iyo kadeed diid.

Saldhigeedu wuxu yahay
Haday manta sudantahay
Saxansaxo udgooniyo
Fooraa I saaqoo
Bari tooy kalaa sugan
Sahan baana ii maqan
Saadaashu waa guul.

Aminta: 10-11-2012
Cali Sh.Maxamed Cabdi (Cali Ileeye)
caliileeye@gmail.com

Faallo reeb

Please enter your comment!
Please enter your name here